د مهترلام ښاروالۍ له لوري په دویمه ناحیه کې د سرک د جوړیدو چارې ۶۰ سلنه بشپړې شوي
د لغمان ولایت مرکز مهترلام ښار په دویمه ناحیه کې د حاجیانو د کلي د سرک جوړولو پروژه، چې د مهترلام ښاروالۍ له داخلي بودیجې څخه تمویلېږي، ۶۰ سلنه یې کارونه بشپړ شوي دي
یاده پروژه چې د ۱۰ میلیونه افغانیو په ارزښت پیل شوې، د تخنیکي معیارونو پر بنسټ پر مخ روانه ده، د ښاروالۍ د ډیزاین او براورد انجنیر عبدالله محمد احمدزی، چې د پروژې د چارو څارنه کوي، وایي چې تر دې دمه د سرک د احاطې او لیول کارونه بشپړ شوي، د سرک او ویالو د کانکریټ اچونې لپاره چمتووالی روان دی چې ډېر ژر به یې چارې ترسره شي
احمدزي زیاته کړه چې دوی د پروژې د ښه معیاري کار او کیفیت په موخه وخت پر وخت نظارت کوي او قراردادي شرکت ته اړینې سپارښتنې کوي، څو کارونه د ټاکل شوو معیارونو سره سم تر سره شي
د سیمې اوسېدونکي له مهترلام ښاروالۍ خوښ دي او وایي" چې د سرک جوړیدو له امله به د دوی ستونزې هوارې شي، د تګ راتګ اسانتیاوې به رامنځته شي، او د موټرو لپاره به خوندي او معیاري لاره برابره شي
د یادونې وړ ده چې په یاده پروژه کې پر ورځني ډول شاوخوا ۱۵ کسانو ته د کار کولو زمینه هم برابره شوې ده
