د مهترلام ښار قصابانو ته د پاک چاپېریال ساتنې په اړه عامه پوهاوی ورکړل شو

د مهترلام ښاروالۍ د ښاري حکومتولۍ آمر الحاج عباس عمري چې د مطبوعاتو او عامه پوهاوي مدیر یې ملتیا کوله، د مهترلام ښار له قصابیو څخه یې لیدنه وکړه او د پاک او منظم چاپېریال د ساتنې په موخه یې قصابانو ته لازمې لارښوونې وکړې

په دې لیدنه کې ښاغلي عمري د قصابیو مسؤلینو ته سپارښتنه وکړه چې د خپلو کارځایونو پاکوالي ته ځانګړې پاملرنه وکړي،
 هغه ټینګار وکړ چې د غوښې د میده کولو ګنډې باید دشپې له لوري په خوندي ځای کې کېښودل شي او د ورځې په مهال د غوښې د ساتنې لپاره باید پر هغې پلاستیک پوښ ولګول شي تر څو له ککړتیا څخه خوندي پاتې شي

عباس عمري، ټولو قصابانو ته خبرداری ورکړ چې له دې وروسته هر ډول سرغړونه قانوني تعقیب لري او د سرغړوونکي پر وړاندې به اړین اجرات سره کېږي، چې بیا حق د شکایت نه لري

د یادونې وړ ده چې د مهترلام ښاروالۍ ښاري حکومتولۍ آمریت له لوري د پاک ښار په موخه وخت پر وخت یاد اقدامات ترسره کېږي، ترڅو ښاریان له یو پاک او منظم ښار څخه برخمن اوسي