د مشرتابه د فرمانونو د تطبیق او د عامه ځایونو د ساتنې په موخه له ګذر وکیلانو سره ناسته وشوه
د مهترلام ښاروالۍ د دویمې ناحیې مدیر مولوي عبدالرحمن مزمل د یادې ناحیې له ګذر وکیلانو سره د مشرتابه د فرمانونو او حکمونو د تطبیق، او په سرکونو او عامه ځایونو کې د ساختماني موادو د نه اچولو په موخه د همغږۍ ناسته ترسره کړه
د ناستې په پیل کې د دویمې ناحیې مدیر ټولو راغلو ګذر وکیلانو ته د ښه راغلاست ترڅنګ ډاډ ورکړ چې ستونزو او غوښتنو ته به یې پر وخت رسېدنه کېږي
نوموړي له ګذر وکیلانو وغوښتل چې د مشرتابه ټولو فرمانونو او حکمونو ته ځانګړې پاملرنه وکړي او د خپلو ګذرونو له اوسېدونکو سره د هغو د عملي کېدو په برخه کې همکاري وکړي
هغه همداراز د ناوړه دودونو د مخنیوي او د ګاونډیانو د حقوقو د رعایت په برخه کې د خلکو د پوهاوي پر زیاتولو ټینګار وکړ او ویې ویل، چې د ګاونډي د حریم پر لوري د کړکیو له جوړولو څخه باید په جدي توګه ډډه وشي
مولوي عبدالرحمن مزمل زیاته کړه، چې په سرکونو او عامه ځایونو کې د ساختماني موادو له اېښودلو څخه هم باید ډډه وشي، ترڅو د ښاریانو د تګ راتګ پر وړاندې خنډونه رامنځته نه شي او عامه ځایونه خوندي پاتې شي
په پای کې ګذر وکیلانو په وار سره خپلې خبرې وکړې، خپلې ستونزې یې شریکې کړې او ډاډ یې ورکړ چې د ناحیې د مدیریت سپارښتنې به له خپلو ګذرونو له اوسېدونکو سره شریکې او د عملي کېدو په برخه کې به یې همکاري وکړي
