د مهترلام ښاروال په مشرۍ اداري ناسته تر سره شوه

هغه ناسته چې نن د مهترلام ښاروال الحاج مولوي رحمت الله شهامت له لوري د یادې ادارې له امرینو او مدیرانو سره برابره شوې وه، په پیل کې ښاروال د ښاروالۍ د تیرې ادارې ناستې ګزارش واوریده او  امرین او مدیران یې خپلو دندو ته متوجه کړل، له دوی یې غوښتنه وکړه چې ورسپارل شوي مسؤلیتونه د قانون په رڼا کې په وخت تر سره کړي
په یاد مجلس کې د ښاروال له لوري ښاري حکومتولۍ امریت ته دنده وسپارله چې په ښار کې خلکو ته د پاک چاپېریال ساتنې په موخه عامه پوهاوی ورکړي، ترڅو کثافات د ښاروالۍ له لوري په لګول شویو کثافت دانیو کې واچوي
همداراز سکتوري امریت او پنځمې ناحيي مدیریت ته دنده وسپارل شوه چې په هډه کې هغه اشخاصو ته چې د بارګینونو په خاطر ځمکې توزیع شوي او ورته ویل شوي ؤ چې بارګینونه جوړ کړي، نو دا چې اوس هغوئ یاد بارګینونه نه دي جوړ کړې، هغه دې ترې مسترد شي او بل هېوادوال ته دې توزیع کړل شي
د یادونې وړ ده چې مهترلام ښاروال په میاشت کې دوه ځلې د ښاروالۍ له امرینو او مدیرانو سره د مهترلام ښار د آبادۍ او سمسورتیا په موخه اداري  ناسته کوي