د مشرتابه د فرمانونو د عملي کولو او تعقیب په موخه د چارو ادارې پلاوي له مهترلام ښاروال سره وکتل

د مشرتابه د فرمانونو د عملي کولو او تعقیب په موخه د چارو ادارې لوی ریاست د مطبوعاتو ریاست څخه راغلي پلاوي د مهترلام ښاروال الحاج مولوي رحمت الله شهامت سره وکتل
په دې لیدنه کې پلاوي د خپل سفر هدف څرګند کړ او وې ویل چې دوی به د مهترلام ښار ترڅنګ په ټول لغمان کې د مشرتابه د ۱۷مې ګڼې فرمان د تطبیق لپاره عملي اقدامات ترسره کړي
د پلاوي د معلوماتو له مخې، د یاد فرمان د عامه پوهاوي په موخه به د ښار په بیلابیلو سیمو کې بنرونه ولګول شي او د خلکو کورونو ته به هم د فرمان پیغام ورسول شي
په ۱۷مه ګڼه فرمان کې ټینګار شوی، چې د خېښیو، ودونو، مصیبتونو، او همداراز د حج او عمرې له راستنېدو پر مهال باید له هغو ناسم او ستړیا جوړونکو دودونو څخه ډډه وشي، کوم چې د خلکو پر اقتصاد او ټولنیزو ارزښتونو ناوړه اغېز لري
ښاروال د پلاوي هرکلی وکړ، دغه اقدام یې یو نیک ګام وباله او ډاډ یې ورکړ چې د ښاروالۍ اداره به د فرمان په پلي کولو کې له پلاوي سره هر اړخیزه همکاري وکړي