د لومړۍ ناحیې اړوند دوهم ګذر لپاره ګذر وکیل وټاکل شو
د ښاري حکومتولۍ د طرزالعمل له مخې، په هر ګذر کې د درې کلونو لپاره ګذر وکیل ټاکل کېږي. په همدې موخه، د مهترلام ښار د یو شمېر ګذر وکیلانو دندې پای ته رسېدلې او د اوسېدونکو په رضایت او غوښتنه نوي ګذر وکیلان ټاکل کېږي
د یادو ګذر وکیلانو د ټاکلو په لړ کې نن حاجي شرف الدین (مومند مجاهد خېل) د حاجي عماد الدین زوی د مهترلام ښار د لومړۍ ناحیې اړوند د دوهم ګذر غربي قلعه دامان لپاره د ګذر وکیل په توګه وټاکل شو
د نوموړي د معرفت په مراسمو کې د مهترلام ښاروالۍ د ښاري حکومتولۍ آمر الحاج عباس عمري، د کلتوري او اجتماعي چارو مدیر رضوان الله زماني او د سیمې یو شمېر اوسېدونکو ګډون کړی و
د ښاري حکومتولۍ مسؤلینو له لوري ښاغلي شرف الدین ته د ګذر وکیل د دندو لایحه تشریح شوه او سپارښتنه ورته وشوه، چې خپلې چارې د نافذه قوانینو او اصولو له مخې پرمخ یوسي
په پای کې نوي ټاکل شوي ګذر وکیل د مهترلام ښاروالۍ له ریاست مقام او د سیمې له اوسېدونکو مننه وکړه، چې پر ده یې باور وکړ او نوموړی یې د ګذر وکیل په توګه وټاکه
نوموړي ډاډ ورکړ، چې د خپل توان مطابق به د سیمې خلکو ته په اخلاص او صداقت خدمت کوي
