د مشرتابه د ۱۷مې ګڼې فرمان د عامه پوهاوي په موخه په لغمان کې بنرونه ولګول شول
د مشرتابه د ۱۷مې ګڼې فرمان د عملي کېدو او خلکو ته د عامه پوهاوي ورکولو په موخه، د مهترلام ښاروالۍ او د اطلاعاتو او کلتور ریاست له لوري د لغمان ولایت د مرکز په ګډون په ټولو ولسوالیو او عمومي لارو کې د پوهاوي بنرونه نصب شول
د لغمان د اطلاعاتو او کلتور رئیس مولوي عبدالنور رسولي وايي، چې د مرکز، ولسوالیو او عمومي لارو په بېلابېلو سیمو کې د یاد فرمان په اړه بنرونه لګول شوي، ترڅو خلک ترې لازم پوهاوی ترلاسه او د مشرتابه ۱۷مه ګڼه فرمان په خپلو ورځنیو چارو کې عملي کړي
د یاد فرمان له مخې، د خېښیو، ودونو، غم او مصیبتونو، او همداراز د حج او عمرې له سفرونو څخه د راستنېدو پر مهال له هغو ناسمو او ستړیا رامنځته کوونکو دودونو څخه د ډډې کولو باندې ټینګار شوی، چې د خلکو پر اقتصادي وضعیت او ټولنیزو ارزښتونو ناوړه اغېز لري
د یادونې وړ ده، چې له دې وړاندې هم مهترلام ښاروالۍ د یوې پراخې غونډې له لارې یاد فرمان اصنافو، ګذر وکیلانو او ښاریانو ته تشریح کړی او له هغوی یې غوښتي وو، چې د فرمان د عملي کېدو په برخه کې لازمې همکارۍ وکړي
