د مشرتابه ۱۷مه او ۲۰مه ګڼه فرمانونه د لغمان ولایت په بېلابیلو ساحو کې د عامه پوهاوي لوحې ولګول شوې
د چارو ادارې لوی ریاست د مطبوعاتو ریاست او د مهترلام ښاروالۍ په همکارۍ د لغمان ولایت د مرکز په شمول په ټولو ولسوالیو کې د مشرتابه د ۱۷مه او ۲۰مه ګڼه فرمانونه د عملي کولو او تطبیق په موخه په بېلابیلو ژبو د عامه پوهاوي بنرونه ولګول شول
د چارو ادارې د مطبوعاتو ریاست له لوري د راغلي پلاوي د معلوماتو له مخې د عامه پوهاوي بنرونو له لګولو یې هدف دادی چې خلک د امیرالمؤمنین د یاد شوي فرمانونو اړوند پوهاوی ترلاسه کړي او هره ماده یې په خپلو ورځنیو چارو کې عملي کړي
په ۱۷مه ګڼه فرمان کې ټینګار شوی، چې د خېښیو، ودونو، مصیبتونو، او همداراز د حج او عمرې له راستنېدو پر مهال باید له هغو ناسم او ستړیا جوړونکو دودونو څخه ډډه وشي، کوم چې د خلکو پر اقتصاد او ټولنیزو ارزښتونو ناوړه اغېز لري
همداراز په ۲۰مه ګڼه فرمان کې لیکل شوي چې د ښاري طرحو ( پلانونو) اړوند د لازمو معلوماتو او تفصیلاتو د خپرول په هکله ښاروالۍ باید ښاریانو ته معلومات وړاندې کړي، ترڅو خلک وشي کولای چې په اسانۍ سره خپلې چارې ترسره کړي
د لغمان مېشت اوسېدونکي د چارو ادارې لوی ریاست د مطبوعاتو ریاست یاد اقدام ستایي او د مشرتابه د فرمانونو هرکلی کوي
دوی وايي، د یاد فرمانونو په عملي کولو سره به له یوه اړخه خلک له اقتصادي مشکلاتو وژغورل شي او له بلې خوا به له ناوړه رواجونو، تاوتریخوالي او ټولنیزو بدبختیو څخه خلاص شي
د یادونې وړ ده چې د مهترلام ښاروالۍ د ښاري حکومتولۍ آمریت له لوري یاد فرمانونه د ښار په مختلفو ساحو کې د عامه پوهاوي په موخه په دیوالونو هم لیکل شوي دي
