د مهترلام ښار په دویمه ناحیه کې د پاک چاپېریال ساتنې په موخه پراخ کمپاین ترسره شو
د مهترلام ښاروالۍ د تنظیف او سرسبزۍ مدیریت زیارکښو کارکوونکو نن د مامور حیات الله "تلوار" په مشرۍ، د ښار د دویمې ناحیې اړوند په بېلابېلو سیمو کې د ویالو او پلچکونو د پاکولو پراخ فعالیتونه ترسره کړل
په دغو فعالیتونو کې له ویالو او پلچکونو څخه کثافات، خځلې، خټې او نور جامد مواد راویستل شول، چې وروسته یو لیرې، خوندي ځای ته انتقال او د چاپېریالي اصولو مطابق دفن شول، دا چارې د اوبو د بهېدنې د عادي حالت د تأمین، د سیلابونو د مخنیوي، او د ښار د پاکوالي په موخه وشول
مامور حیات الله وايي: دغه فعالیتونه د مشخص پلان له مخې هره ورځ په منظم ډول ترسره کېږي، څو د ښار ټولو ناحیو ته رسیدنه وشي او یو پاک، منظم او سالم چاپېریال ولرو
هغه له ښاریانو غوښتنه کوي چې د ویالو د بندېدو مخنیوي لپاره همکاري وکړي، خځلې په ټاکلي ځای کې واچوي، او د ښاري نظم په ټینګښت کې اوږه په اوږه ورسره ودرېږي
