د نورستان سېلاب ځپلو سره د مرستې په موخه د مهترلام ښاروالۍ پلاوی نورستان ته روان شو
د نورستان ولایت له سېلاب ځپلو کورنیو سره د مرستې او همکارۍ په موخه، د مهترلام ښاروال الحاج مولوي نظر محمد عتیق په مشرۍ د مهترلام ښاروالۍ یو پلاوی یاد ولایت ته روان شو
په دغه پلاوي کې د ښاروالۍ د عوایدو او محاسبې آمر حاجي احمد زبیر سالار، یو شمېر مدیران او د تنظیف زیارکښ کارکوونکي هم ګډون لري، چې موخه یې له سېلاب ځپلو سره د مرستې او د اړینو همکاريو ترسره کول دي
مهترلام ښاروال وویل، چې د اسلامي او انساني مسؤلیت له مخې د طبیعي پېښو له زیانمنو هېوادوالو سره مرسته د ټولو ګډه دنده ده، او مهترلام ښاروالۍ به د خپلې وسې او امکاناتو په چوکاټ کې له زیانمنو کورنیو سره لازمې همکارۍ ترسره کړي
د یادونې وړ ده، چې نن د نورستان ولایت په ځینو سیمو کې د سختو سېلابونو له امله خلکو ته مالي او ځاني زیانونه اوښتي دي
