د ښاري نظم او د پلو لارو د خلاصون ګډ کمېسیون په مهترلام ښار کې پراخ کمپاین ترسره کړ
د ښاري نظم د ټینګښت او د پلو لارو د خلاصون په موخه هغه ګډ کمېسیون چې د ولایت مقام له لوري ترتیب شوی او مشري یې د ترافیکو مدیر مولوي حبیبالله مبارز کوي، نن یې د مهترلام ښار په بېلابېلو برخو کې خپل پراخ کمپاین ترسره کړ
یاد کمېسیون چې په ترکیب کې یې د مهترلام ښاروالۍ، لومړۍ امنیتي حوزې، ترانسپورټ ریاست او د اصنافو ریاست مسؤلین شامل دي، د هغو دوکاندارانو او هټیوالو پر وړاندې عملي اقدام وکړل چې د جنسونو، ترپالو، لاسي کراچیو او بېلابېلو توکو په وسیله یې پلې لارې بندې کړې وې
د ترافیکو مدیر حبیبالله مبارز وویل، چې د پلو لارو د خلاصون کمپاین یې نن له رحماني چوک څخه پیل کړ او تر هغه به دوام کوي تر څو د ښار ټولې پلې لارې د ښاریانو پرمخ پاکې او خلاصې شي
همداراز نوموړي زیاته کړه چې د کمېسیون له لوري د لاسي کراچیو پلورونکو لپاره ځانګړي ځایونه مشخص شوي او ټول پلورونکي مکلف دي چې پر ټاکل شویو ځایونو کې خپل فعالیت ترسره کړي
د مهترلام ښاروالۍ د لومړۍ ناحیې مدیر ملا عباس ابراهیمي وویل، چې د ګډ کمېسیون له لوري د ښاري نظم ټینګښت ته ځانګړې پاملرنه شوې او هېچا ته به اجازه ورنه کړل شي چې په ښار کې بېنظمي رامنځته کړي
