د کوټي تور، نانکزیو او ده هاشم سیمو اوسېدونکو خپلې ستونزې د حل په موخه له ښاري حکومتولۍ آمریت سره شریکې کړې
د مهترلام ښار د لومړۍ ناحيې اړوند د کوټي تور، نانکزیو او ده هاشم سیمو یو شمېر مشرانو او اوسېدونکو خپلې ستونزې او غوښتنې د حل په موخه د مهترلام ښاروالۍ د ښاري حکومتولۍ آمر الحاج عباس عمري سره شریکې کړې
یادو مشرانو په پیل کې د مهترلام ښاروالۍ له لوري د خلکو ستونزو ته د رسېدنې او د مستقیمو اړیکو د رامنځته کېدو هرکلی وکړ او وروسته یې خپلې یو شمېر ستونزې او غوښتنې وړاندې کړې
مشرانو غوښتنه وکړه چې په سیمه کې یې د ګذر وکیل درې کلنه موده پوره شوې او یو وړ خدمتګاره او ایمانداره شخص چې ټول ولسونه پرې راټول دي باید د ګذر وکیل په توګه ورته وټاکل شي، ترڅو د سیمې ستونزې یې په وخت له ښاروالۍ مقام سره شریکې کړي
عباس عمري ټولو راغلو مشرانو ته د ښه راغلاست ترڅنګ ډاډ ورکړ چې ستونزو ته به یې رسیدنه کوي او د ښاري حکومتولۍ د طرزالعمل مطابق به خپله کړنه ترسره کوي
