په دویمه ناحیه کې د سرک جوړولو چارې په چټکۍ روانې دي
د مهترلام ښاروالۍ له داخلي بودیجې د ښار په دویمه ناحیه کې د حاجیانو د کلي د سرک جوړولو پروژه د لس میلیونه افغانیو په ارزښت پیل شوې، چې دا مهال یې ۴۰ سلنه چارې بشپړې شوې دي
د حاجیانو د کلي د سرک جوړېدو چارې د تخنیکي معیارونو سره سم پر مخ روانې دي، او د پلان له مخې به ژر تر ژره بشپړه شي
په دغه پروژه کې په ورځني ډول ۳۰ کسانو ته د کار زمینه هم برابره شوې ده، چې دا کار نه یوازې د بېروزګارۍ په کموالي کې مرسته کوي، بلکې د سیمه ییز اقتصاد د پیاوړتیا سبب هم ګرځي
د سیمې اوسېدونکي له ښاروالۍ خوښ دي او وایي چې د سرک جوړیدو له امله به د دوی ستونزې هوارې شي، د تګ راتګ اسانتیاوې به رامنځته شي، او د موټرو لپاره به خوندي او معیاري لاره برابره شي
د یادونې وړ ده چې اوس مهال د مهترلام ښاروالۍ له لوري د ښار په مختلفو ساحو کې د بیارغونې کارونه روان دي چې ډیری خلکو ته پکې د کار کولو زمینه برابره شوې ده
