په دویمه ناحیه کې د شهید مولوي حبیب الرحمن پارک د احاطې چارې روانې دي
د مهترلام ښاروالۍ د ۱۴۰۵ کال د پروژو په دوام، د ښاروالۍ له داخلي بودیجې څخه د ۲.۵ میلیونه افغانیو په ارزښت په دویمه ناحیه کې د شهید مولوي حبیب الرحمن پارک د احاطې د جوړېدو چارې د پلان له مخې په منظم ډول جریان لري
د یادې پروژې د چارو د کیفیت او معیار د ډاډ ترلاسه کولو په موخه، د ښاروالۍ تخنیکي او مسلکي انجنیران وخت پر وخت له پروژې څخه نظارت کوي، ترڅو ټول کارونه د ټاکل شویو معیارونو او تخنیکي اصولو مطابق ترسره شي
په یاده پروژه کې هره ورځ شاوخوا ۲۵ بېروزګاره ځوانانو ته د کار زمینه هم برابره شوې، چې له یوې خوا د پروژې په پلي کېدو کې ونډه اخلي او له بلې خوا خپلو اولادونو ته حلال رزق ګټي
