په مهترلام ښاروالۍ کې د ظرفیت لوړونې یو ورځنی ورکشاپ ترسره شو
د مهترلام ښاروالۍ د کارکوونکو د مسلکي ودې او د ادارې خدماتو د کیفیت لوړوالي په موخه، د لغمان ولایت د اداري اصلاحاتو ریاست له لوري د ښاروالۍ د مدیرانو او مامورینو لپاره یو ورځنی روزنیز ورکشاپ ترسره شو
یاد ورکشاپ چې د مهترلام ښاروالۍ د کارکوونکو چارو مدیریت په هڅو برابر شوی ؤ ټولو ګډونوالو ته د مسؤلیت پیژندنې، د کارکوونکو ارزیابۍ د فورمو د سم ډکولو، اداري چارو د تنظیم، د اصولو رعایت او له مراجعینو سره د مناسب برخورد او ښې رویې اړوند مفصلې لارښوونې او توضیحات ورکړل شول
د ورکشاپ موخه دا وه چې د ښاروالۍ کارکوونکي د خپل مسؤلیت، دندې، او د خدماتو د وړاندې کولو په بهیر کې نور هم پیاوړي، مسؤلیتپذیر او چټک عمل کوونکي شي، تر څو وکولای شي د ښاریانو ستونزې پر وخت او په اغېزمن ډول حل کړي
مهترلام ښاروال الحاج مولوي رحمت الله شهامت د اداري اصلاحاتو ریاست له هڅو او همکارۍ مننه وکړه، او دغه ډول روزنیزو پروګرامونو ته یې د دوام غوښتنه وکړه، څو د ښاري خدمتونو کیفیت لوړ او اداري سیستم لا منسجم شي
