د مهترلام ښاروالۍ له لوري په رسمي او منظور شويو پلانونو کې د خطاندازۍ چارې روانې دي
د مهترلام ښاروال الحاج مولوي نظر محمد عتیق د ځانګړې لارښونې پر بنسټ، د ښاروالۍ د پلان مدیر فرهاد سهاک او اصلاحي او تفصلي پلان مامور انجنیر عبدالواحد محمدي له لوري په رسمي او منظور شويو پلانونو کې د خلکو د نمرو د تثبیت او خطاندازۍ چارې په منظم ډول روانې دي
د ښاروالۍ د پلان مدیر فرهاد سهاک وویل، چې دا پروسه اوس مهال د مهترلام ښار د څلورمې ناحیې اړوند د څپرو په تفصلي او انکشافي پلان کې جریان لري او په راتلونکو پړاوونو کې به نور ټول منظور شوي پلانونه هم تثبیت او خطاندازي شي
نوموړي زیاته کړه، دا هغه نمرې دي چې په تېرو کلونو کې توزیع شوې وې، خو تر اوسه یې عملي تثبیت نه و شوی، اوس به د یادې پروسې له بشپړېدو وروسته هر شخص ته خپله نمره په واضح ډول وښودل شي
هغه همداراز وویل، چې د خطاندازۍ او تثبیت له بشپړېدو سره به له یوې خوا د خلکو د سرپناه ستونزې هوارې شي او له بلې خوا به ګڼ شمېر بېکاره ځوانانو ته د کار زمینه برابره شي
د یادونې وړ ده، چې د نمرو له تثبیت او خط اندازۍ وروسته هغه هېوادوال چې په یادو پلانونو کې استوګنیزې نمرې لري، کولای شي د ښاروالۍ د قانوني جواز له ترلاسه کولو وروسته د خپلو نمرو د آبادۍ چارې پیل کړي
