دلغمان په مرکز مهترلام کې د امام ابوحنیفه په نوم د عیدګاه مسجد او مدرسې د جوړیدو د بنسټ ډبره کېښودل شوه.
ددغه مسجد د جوړیدو د چارو پيل په مراسمو کې د لغمان والي ښاغلي عبدالولي واحدزي، مهترلام ښاروال مجاهد رحمت زي، د ارشاد حج اوقافو رئیس، د عالمانو شورا رئیس، د بېلا بېلو ادارو مسوولینو، لسګونه دیني عالمانو او د سیمي اوسیدونکو برخه اخیستې وه.
دلغمان والي ښاغلي عبدالولي واحدزي خوښي اوښوده، چې نن یې د سلطان غازي بابا ښارګوټي په R5 سیمه کې د یوه عیدګاه مسجد او مدرسي د جوړیدو د چارو پیل کې برخه واخیستله.
هغه زیاته کړه، چې ددغه مسجد ساختمان کې به ټول معیارونه په پام کې ونیول شي او ورسره به یوه دیني مدرسه هم جوړه شي.
د ارشاد حج اوقافو رئیس مولوي سید نجیب الله هاشمي له ولایتي ادارې او مهترلام ښاروالۍ څخه مننه وکړه، چې په ټولو ښارګوټو کې یې مساجدو ته وړ او مناسب ځایونه جدا کړي دي.
هغه وویل، چې د ارشاد حج اوقافو وزارت د مساجدو د جوړیدو لپاره دومره بودیجه نه لري، ولې ددې مسجد په څېر یې که خلک په شخصي لګښت جوړه وي، دوی یې هرکلی کوي او ددې کار ستاېنه او ملاتړ ته دوام ورکوي.
د یادونې وړ ده چې په R5 سیمه ددغه جوړیدونکي مسجد لګښت د سیمي خلک او سرمایداره وګړي ورکوي.
