حاجي محمد طالب خپلواک یو ځل بیا د مهترلام ښار د اصنافو د رئیس په توګه وټاکل شو

د مهترلام ښار د اصنافو د غوښتنې، د لغمان ولایت مقام د رسمي حکم او د مهترلام ښاروال الحاج مولوي رحمت الله شهامت د لارښوونې پر بنسټ، د ښاروالۍ د ښاري حکومتولۍ آمریت له لوري حاجي محمد طالب خپلواک یو ځل بیا د مهترلام ښار د اصنافو د رئیس په توګه وټاکل شو
د نوموړي د ټاکنې په مراسمو کې د ښاروالۍ د څارنې او ارزونې امر الحاج عبدالطیف اخندزاده، د ښاري حکومتولۍ امر حاجي عباس عمري، د اصنافو استازو او یو شمېر دوکاندارانو ګډون کړی وو
د ښاري حکومتولۍ امر حاجي عباس عمري وویل، چې د ښاري حکومتولۍ د طرزالعمل له مخې د اصنافو رئیس هر درې کاله وروسته ټاکل کېږي، او دا چې د حاجي محمد طالب خپلواک موده بشپړه شوې وه، نو د مهترلام ښار د اصنافو د غوښتنې، د ولایت مقام د حکم او د ښاروال په لارښونې نوموړی یو ځل بیا د درې کلونو لپاره د اصنافو د رئیس په توګه اعلان شو
حاجي محمد طالب خپلواک د ولایت مقام، ښاروالۍ او د اصنافو له استازو څخه مننه وکړه چې پرې یې باور وکړ، او ژمنه یې وکړه چې د تېرو کلونو په پرتله به لا ښه خدمتونه وړاندې کړي
د یادونې وړ ده، چې نوموړي له دې وړاندې هم د اصنافو د رئیس په توګه دنده ترسره کړې وه، چې اوس یې موده د درېیو نورو کلونو لپاره تمدید شوه