د مهترلام ښاروالۍ د تیلو پمپ، موټرشویي او څاه ګانو د نوې پروژې له چارو څخه لیدنه تر سره شوه
د مهترلام ښاروالۍ له داخلي بودیجې د ۲۲ میلیونه افغانیو په ارزښت د پنځمې ناحیې اړوند، د کابل ـ جلالاباد هډې ته څېرمه د تیلو پمپ، موټرشویي او د دوو څاه ګانو د جوړولو د سترې پروژې چارې رسماً پیل شوي، چې نن د دې پروژې د کارونو د ښه کیفیت د تضمین لپاره، مهترلام ښاروال الحاج مولوي رحمت الله شهامت د پروژې ساحې ته لاړ او چارې له نږدې وڅارلې
ښاروال د پروژې له مسؤلینو وغوښتل چې ټول کارونه دې په اساسي، معیاري او د تخنیکي اصولو مطابق ترسره کړي
یاده دې وي چې د مهترلام ښار ګڼ شمېر اوسېدونکي او په پروژه کې بوخت کاریګر د ښاروالۍ له دې اقدام څخه خوښي څرګندوي. دوی وايي، چې دغه پروژه نه یوازې د ښار د خدماتي ضرورتونو د پوره کولو لپاره مهمه ده، بلکې ګڼو کسانو ته یې د حلال کار د روزګار زمینه هم برابره کړې ده
