په پنځمه ناحیه کې د پُل د کټارو د جوړولو او خلاصېدو چارې پیل شوې
د وروستیو بارانونو او سیلابونو له امله د مهترلام ښار د پنځمې ناحیې اړوند یو پُل زیانمن شوی وو، چې د کټارو یوه برخه یې تخریب شوې وه او د اوبو جریان یې هم بند شوی وو د یادې ستونزې د حل په موخه د مهترلام ښاروالۍ له لوري د پُل د کټارو د رغونې او د اوبو د جریان د خلاصېدو چارې پیل شوې دي
نن د دغو کارونو د ښه کیفیت ډاډ ترلاسه کولو په موخه مهترلام ښاروال الحاج مولوي رحمت الله شهامت له یادو کارونو څخه لیدنه وکړه. په دې لیدنه کې د ښاروال ترڅنګ د پنځمې ناحیې مدیر، محمد منیر فاروق هم حضور درلود
ښاروال اړوندو مسؤولینو ته د معیاري او اساسي کار سپارښتنه وکړه او ټینګار یې وکړ چې چارې باید په منظم شکل ترسره شي
د یادونې وړ ده چې د یادو کټارو په جوړیدو او د پُل په خلاصیدو سره به نه یوازې د یادې سیمې ښکلا نوره هم زیاته شي، بلکې د اوسېدونکو لپاره به د تګ راتګ اسانتیاوې هم برابرې شي او د اوبو د جریان ستونزه به تر ډېره هوارې شي
