د دوهمې ناحيې اړوند د نهم ګذر اوسیدونکو لپاره ګذر وکیل وټاکل شو
د مهترلام ښاروالۍ د ښاري حکومتولۍ آمریت له لوري حاجي عبدالقیوم محمدي د مهترلام ښار د دوهمې ناحيې اړوند د نهم ګذر حاجیانو کلي د ګذر وکیل په توګه وټاکل شو
دا چې نوموړي له دې وړاندې هم د یاد ګذر د وکیل په توګه مسؤلیت درلود او درې کلنه موده یې پوره شوې وه د یادې سیمې د اوسیدونکو په غوښتنه یو ځل بیا د درې کلنو لپاره د ګذر وکیل په توګه وټاکل شو
د نوموړي د پیژندنې په مراسمو کې د مهترلام ښاروالۍ د څارنې او ارزونې آمر الحاج عبدالطیف اخندزاده، د مطبوعاتو او عامه پوهاوي مدیر لعل آغا ابراهیمي، د کلتوري او اجتماعي چارو مدیر رضوان الله زماني او د یادې سیمې اوسیدونکو ګډون کړی وو
د ښاري حکومتولۍ د مسؤلینو له لوري حاجي عبدالقیوم محمدي ته د ګذر وکیل د دندو لایحه تشریح شوه او سپارښتنه ورته وشوه ترڅو خپلې چارې د نافذه قوانینو پر اساس پرمخ یوسي
په پای کې وکیل محمدي د مهترلام ښاروالۍ د ریاست مقام ترڅنګ د نهم ګذر له اوسیدونکو مننه وکړه چې دی یې د ګذر وکیل په توګه وټاکه
نوموړي د کلي ټولو اوسیدونکو ته ډاډ ورکړ چې د خپل وس مطابق به شپه او ورځ دوی ته خدمت کوي
