لغمان کې له پاکستان څخه راستنیدونکو کډوالو لپاره موقتي پنډغالی جوړ شو
د ولایت مقام د حکم پر اساس د یو ګډ کمېسيون له لوري د لغمان قرغیو ولسوالۍ سرخکانو ساحه کې له پاکستان څخه بېرته راستنیدونکو مهاجرینو لپاره موقتي پنډغالی جوړ شو
یاد پنډغالی د مهاجرینو ریاست په مشرۍ د یو ګډ کمېسیون له لوري چې مهترلام ښاروالۍ، امنیي قوماندانۍ، استخبارات، صنغت او سوداګرۍ، سرې میاشتې او د پېښو پر وړاندې د مبارزې ریاست مسؤلینو له لوري جوړ کړل شو
مهترلام ښاروال الحاج مولوي رحمت الله شهامت چې د پنډ غالي د جوړیدو پرمهال یې شتون درلود وې ویل چې یاد پنډ غالي کې د کډوالو لپاره هر ډول سهولتونه په نظر کې نیول شوي دي، چې د اوبو او ترانسپورټ خدمات د ښاروالۍ له خوا او نور د اړتیا وړ توکي د همکارو ریاستونو له لوري وړاندې کېږي
د یادونې وړ ده چې له دې وړاندې هم لغمان ولایتي ادارې او همکارو ریاستونو له لوري مهاجرینو لپاره ګڼ شمېر اسانتیاوې برابرې شوې وې
