د مهترلام ښار د ګذرونو له وکیلانو سره د همغږۍ ناسته ترسره شوه
د مهترلام ښاروالۍ له لوري د ښار د ګذرونو له وکیلانو سره د همغږۍ او ستونزو د اورېدو په موخه ځانګړې ناسته ترسره شوه
په یاده ناسته کې د ښاري حکومتولۍ آمر الحاج عباس عمري، د تخنیکي او مسلکي چارو آمر انجنیر زاهدالله مجددي، د ناحیو مدیرانو او د بېلابېلو ګذرونو وکیلانو ګډون کړی و
د ناستې په پیل کې د ښاري حکومتولۍ آمر ټولو ګډونوالو ته ښه راغلاست وویل، او څرګنده یې کړه، چې د ښاري حکومتولۍ د طرزالعمل له مخې به ټول ګذرونه په اساسي او معیاري ډول جوړ او تنظیم شي، ترڅو ښاریانو ته غوره خدمات وړاندې شي
ورپسې د تخنیکي او مسلکي چارو آمر انجنیر زاهدالله مجددي وویل، چې په ۱۴۰۵ مالي کال کې به د یو شمېر مؤسسو په مالي همکارۍ د ښار په ټولو ګذرونو کې د بیارغونې او پراختیا چارې پلي شي
نوموړي له ګذر وکیلانو وغوښتل، چې د خپلو سیمو ستونزې او اړتیاوې په لیکلي ډول له ښاروالۍ سره شریکې کړي، ترڅو ورته په منظم او اصولي ډول رسیدنه وشي
په پای کې ګذر وکیلانو په نوبت سره خبرې وکړې او د مهترلام ښاروالۍ له رهبرۍ یې مننه وکړه، چې د دوی ستونزې مخامخ اوري او د حل په موخه عملي ګامونه اخلي
د یادونې وړ ده، چې د ۱۴۰۵ کال په اوږدو کې به مهترلام ښاروالۍ د نورو پراختیايي چارو ترڅنګ د مهترلام ښار د پنځو واړو ناحیو ګذرونو ته ځانګړې پاملرنه وکړي او د سړکونو او لښتیو د جوړولو چارې به یې په منظم شکل ترسره کړي
