په مهترلام ښار کې د تیلو پمپ استیشن د جوړولو لپاره آفر پرانیستل شو
د مهترلام ښاروالۍ له لوري په پنځمه ناحیه کې ، د کابل ـ جلال آباد هډې ترڅنګ د موټر چلوونکو د سهولت او د ښاروالۍ د عوایدو د زیاتوالي په موخه د یوه معیاري د تیلو پمپ استیشن د جوړولو چارې پیل کېږي
د یادې پروژې ترڅنګ به موټرشويي، د اوبو څاه او د فاضله موادو د ایستلو څاه ګانې هم جوړې شي
په همدې موخه د داوطلبۍ پروسه د ولایت مقام د ټاکل شوې کمیټې او د مهترلام ښاروال الحاج مولوي رحمت الله شهامت په حضور کې ترسره شوه، چې په کې شپږو داوطلبانو ګډون کړی و
د ولایت مقام د ارزیابۍ کمیټې له تائید وروسته به ګټونکی شرکت اعلان شي او له هغه سره به د قرارداد لاسلیک ترسره شي
یاده دې وي چې د تیلو دغه پمپ استیشن به د ښاریانو لپاره د آسانتیاوو ترڅنګ د ښاروالۍ د عوایدو د زیاتوالي یوه مهمه سرچینه هم وګرځي
