په مهترلام ښار کې د سرک پر غاړو د بېنظمۍ مخنیوی؛ ښاروالۍ هټیوال خپلو ځایونو ته را وګرځول
د مهترلام ښاروالۍ د ښاري نظم د ټینګښت او د ترافیکي ستونزو د مخنیوي په موخه، د ښار د لومړۍ ناحیې مدیر ملا عباس ابراهیمي، چې د ښاروالۍ ښاري انظباط مدیر قاري سید آغا یې ملتیا کوله، د کلچه پزې مخې هغه ساحه یې وڅارله چېرې چې هټیوالو د سرک دواړو غاړو ته خپل جنسونه راښکته کړې وو او د جنسونو په واسطه یې د تګ راتګ ستونزې رامنځته کړې وې.
په یاده ساحه کې د سرک دواړو غاړو ته د بېنظمه پلور له امله د تګ راتګ ستونزې رامنځته شوې وې، چې د ښاریانو د جدي شکایتونو سبب شوی وو، چې د ښاروالۍ د لومړۍ ناحيي مدیر له جدي څار وروسته، د یاد سړک د پاکولو، پراخولو او د تګ راتګ د اسانتیا لپاره عملي اقدامات ترسره شول.
ملا عباس ابراهیمي ټولو هټیوالو ته جدي سپارښتنه وکړه چې خپل کاروبار دې یوازې په ټاکل شویو ځایونو کې ترسره کړي او له دې وروسته دې د سرکونو او پلو لارو د بندېدو سبب نه کېږي.
نوموړي ټینګار وکړ، که هر څوک د ښاروالۍ له تګلارې سرغړونه وکړي او هندواڼې یا نور توکي د تګ راتګ په لارو کې کېږدي، ورسره به قانوني چلند وشي، چې بیا حق د شکایت نه لري
ښاریانو د ښاروالۍ له دې اقدامه تود هرکلی وکړ او ټینګار یې وکړ چې دا ډول منظم او مسؤلانه فعالیتونه باید دوامداره وي، څو ښار له بېنظمۍ وژغورل شي او عام خلک په ارامه فضا کې تګ راتګ وکړي
د یادونې وړ ده چې د مهترلام ښاروال الحاج مولوي رحمت الله شهامت له لوري د ښار د ښه نظم په موخه د مهترلام ښاروالۍ د امرینو او د لومړۍ ناحيي مدیر په مشرۍ یو ګډ کمېسیون هم جوړ کړی چې یاد کمېسیون وخت پر وخت له ښار څخه څارنه کوي
