په ګذرونو کې د بېسرپرسته او یتیمو ماشومانو د تثبیت په موخه ناسته ترسره شوه
د مهترلام ښاروالۍ د لومړۍ ناحیې مدیریت له لوري د بېسرپرسته او یتیمو ماشومانو د تثبیت او لېست کولو په موخه د یادې ناحیې له ګذر وکیلانو سره ناسته ترسره شوه
یاده ناسته د لومړۍ ناحیې د مدیر ملا عباس ابراهیمي په مشرۍ جوړه شوې وه، چې پکې ګذر وکیلانو ته ځانګړې فورمې ووېشل شوې، تر څو په خپلو اړوندو ګذرونو کې بېسرپرسته او یتیم ماشومان په منظم ډول ثبت او معلومات یې له ناحیې مدیریت سره شریک کړي
ملا عباس ابراهیمي وویل، د مهترلام ښاروالۍ د ښاري حکومتولۍ آمریت له لوري موږ ته یو رسمي مکتوب راغلی وو، چې په ګذرونو کې د بې سرپرسته ماشومانو ارقام ورته لېست او ورسره شریک کړو ترڅو هغوئ یې مربوطه ارګانونو ته د مرستو په موخه وړاندې کړي
د یادونې وړ ده چې د مهترلام ښاروالۍ ښاري حکومتولۍ آمریت له اړمنو قشرونو سره د ملاتړ په برخه خپلې هڅې روانې ساتلې دي
