نن په لغمان ولایت کې سلګونو ولسونو د کب ۹مه د سرتیرو ملي ورځ په پراخ ګډون سره ولمانځله
په همدې موخه نن شنبه د کب پر ۹ ځانګړي مراسم ترسره شول، چې پرمهال يې د لغمان والي رحمت الله يارمل سربېره، مرستيال والي پوهنوال دوکتور خواجه محمد عصامي، مهترلام ښاروال مجاهد رحمت زي، د ملکي او نظامي ادارو مسوولينو، سلګونه ديني عالمانو، قومي مشرانو، ورزشکارانو، ځوانانو، مېرمنو او يو شمېر نورو ګډون کړی وو.
لغمان والي رحمت الله يارمل د سرتیرو ملي ورځې نمانځې راغلو ولسونو ته د ښه راغلاست ترڅنګ له هغوی مننه وکړه، چې د ملي او امنيتي ځواکونو د ملي ورځې د نمانځنې په مراسمو کې يې له دوی سره ګډون وکړ.
هغه د ملي امنيتي او دفاعي ځواکونو په ليکه کې ټولو شهيدو شويو سرتېرو ته د الله ج له دربار څخه د جنت الفردوس او ټپيانو ته د عاجلې شفا غوښتنه وکړه.
نوموړي افغان ملي امنيتي او دفاعي ځواکونه د هېواد، خاورې او ناموس اصلي ساتوونکي ياد کړل او د دوی د قربانیو ستاينه يې وکړه.
ښاغلي يارمل امنيتي ځواکونو ته په خطاب کې وويل(( ستاسو دنده مقدسه او سپېڅلې ده او په دې لاره کې مو هر راز قرباني د ستاينې وړ ده))
والي يارمل وويل دا ولسونه د خپلو ملي او امنيتي ځواکونو د ملاتړ او ستاينې په موخه راټول شوي او د دوی د قربانيو ستاينه کوي.
لغمان والي په وسله والو طالبانو غږ وکړ، چې له جکړې لاس واخلي او د سولې له روانې پروسې سره يوځای شي او د خپلې کورنۍ سره دې په ارامۍ کې ژوند وکړي.
نوموړي وويل د خپلو امنيتي او دفاعي ځواکونو څخه په کلکه ملاتړ کوي او ډاډ يې ورکړ، چې ټولو ستونزو، غوښتنو او وړانديزونو ته به يې د قانون په چوکاټ کې رسيدګي وشي.
ورپسې د ولايتي شورا رئيس عتيق الله عبدالرحيمزي وويل افغان امنيتي او دفاعي ځواکونه مېړني او د هېواد اصلي ساتوونکي دي.
هغه له ټولو ولسونو وغوښتل، چې په خپلو منځونو کې سره يوځای شي، ترڅو دا هېواد جوړ شي او افغانان يو دايمي اوربند او تل پاتې سولې ته ورسېږي.
بلخوا بيا قومي مشر حاجي شامرد خان او قومندان محمد آصف هوتک په خپلو خبرو کې د امنيتي او دفاعي ځواکونو د قربانيو ستاينه وکړه او ډاډ يې ورکړ، چې ټول ولسونه يې په کلکه ملاتړ کوي.
په دې ځانګړو مراسمو کې د ملي امنيتي او دفاعي ځواکونو رسمي ګزشت، ورزشي نمايشونه، سرتېرو ته ويل شوې ترانې او ترنمونو سربېره د ولايت مقام له لوري د امنيتي ځواکونو رهبري او يو شمېر سرتېري په تقديرنامو وستايل شول.
د يادونې وړ ده، چې د کب نهمه د ملي امنيتي او دفاعي ځواکونو ملي ورځ په ټول هېواد کې د يو لړ ځانګړو مراسمو په ترس کې نمانځل کېږي او د سرتیرو د قربانیو او سرښندنو په ویاړ پکې ځانګړي پروګرامونه ترسره کیږي.
۱۳۹۹/۱۲/۹
