د حاجیانو کلي د سرک دویم فاز چارې چې د اجتماعي ستونزو له امله ځنډېدلې وې، نن رسماً پیل شوې
د مهترلام ښاروالۍ له داخلي بودیجې د ۱۵ نیم میلیونه افغانیو په ارزښت د دوهمې ناحیې اړوند د حاجیانو کلي د سرک دویم فاز چارې نن پیل شوې
مهترلام ښاروال الحاج مولوي نظر محمد عتیق، چې د تخنیکي او مسلکي چارو آمر انجنیر زاهد الله مجددي یې ملتیا کوله، له یادې پروژې څخه لیدنه وکړه او د چارو د چټک او معیاري پرمخ بېولو په موخه یې د شرکت مسؤلینو ته سپارښتنې وکړې
د تخنیکي او مسلکي چارو آمر انجنیر زاهد الله مجددي وویل، چې د سرک کارونه د ځینو اجتماعي ستونزو له امله ځنډېدلي وو، خو اوس یادې ستونزې حل شوې او چارې یې په رسمي ډول پیل شوې دي.
نوموړي زیاته کړه، چې تمه ده د دې سرک چارې به د څلورو میاشتو په موده کې بشپړې او ګټې اخیستنې ته وسپارل شي
د سیمې اوسېدونکو د یادې پروژې له پیل څخه خوښي څرګنده کړه او وې ویل، چې د سرک د پراختیا په مسیر کې یې خپل کورونه په خپله خوښه ونړول، څو د پروژې د تطبیق زمینه برابره شي
د یادونې وړ ده، چې په دې پروژه کې د مهترلام ښاروالۍ له لوري ګڼو بې کاره ځوانانو ته د کار زمینه هم برابره شوې ده
