د کارونو د چټکتیا په موخه اداري ناسته ترسره شوه
مهترلام ښاروال الحاج مولوي رحمت الله شهامت د ښاروالۍ له امرینو او مدیرانو سره د کارونو د چټکتیا او په ښار کې د ګڼې ګوڼې د مخنیوي په موخه ناسته وکړه
په یاده ناسته کې د ښاروال له لوري لومړی د تیر اداري مجلس د وظایفو او ورکړل شویو دندو ګزارش واوریدل شو، بیا له ټولو مدیرانو په ځانګړي توګه له مسلکي او تخنیکي، مالي او اداري آمریتونو څخه غوښتنه وشوه، چې په روان ۱۴۰۴ کال کې خپل فعالیتونه لا چټک کړي تر څو د کال تر پایه پروژې، حوالې او قراردادونه په منظم شکل په وخت ترسره شي
همداراز ښاروال د مجلس ټولو ګډونوالو ته سپارښتنه وکړه چې د مراجعینو ستونزو او له نورو اداراتو څخه راغلو مکتوبونو ته په وخت ځواب ورکړي، که هرچا په خپل برخه کې غفلت وکړ، قانوني چلند ورسره کېږي چې بیا حق د شکایت نه لري
د مجلس په پای کې د ښاروال له لوري د کوچني اختر په مناسبت د ښار د ښکلا او د ګڼې ګوڼې د مخنیوي په موخه مدیرانو ته یو لړ مهم کارونه هم وسپارل ترڅو ترسره یې کړي
