مستحقو کورنیو ته د ډوډی ویش رسما پیل شو
د لغمان مرکز مهترلام ښار کې ۷۲۹۷ اړمنو کورنیو باندې د وچې ډوډۍ د وېش لړۍ پیل شوه.
دلغمان ولایت مرکز مهترلام ښار کې د یکشنبې په ورځ د غویي په ۲۱ نېټه د دې ولایت والي محمد اصف ننګ، مهترلام ښاروال انجینر نظیف الله الکوزي, د ولایتي شورا رئیس عتیق الله عبدالرحیمزي او یو شمېر نورو په شتون کې له اړمنو سره د وچې ډوډۍ د وېش لړۍ پیل شوه.
مهترلام ښاروال نظیف الله الکوزي د معلوماتو له مخې چې دوی د ګذر وکیلانو له لارې د ښار په ناحیو کې د ۷۲۹۷ اړمنو لیستونه برابر کړي او نن پرې عملاً د وچې ډوډۍ د وېش لړۍ پیل شوه.
نوموړی وایي، په دغه پروسه کې به تر یوې میاشتې پورې هرې کورنۍ ته د ورځې ۱۰ ډوډۍ ورکول کیږي.
په ورته مهال د لغمان والي محمد اصف ننګ له جمهور رئیس محمد اشرف غني څخه مننه وکړه چې په هېواد کې د اړمنو شمېر ته په کتو یې د وچې ډوډۍ د وېش پروسې د پیل امر وکړ.
هغه وویل، هره ورځ به د مهترلام ښاروالۍ له لوري ټاکل شویو اړمنو ته په وخت وچه ډوډۍ ویشل کېږي او تمه ده چې د ولایتي شورا غړي، مدني ټولنې او د رسنیو استازي ددغې پروسې د نظارت په برخه کې همکار پاتې شي.
دلغمان والي دغه راز زیاتوي چې د اړمنو وګړو شمېر ډیرښت ته په کتو یې له مرکز څخه د ۳۰۰۰ نورو سهمونو د ورکړې غوښتنه کړې،چې ډیر ژر به یې منظوري راشي.
مهترلام ښاروالی
