د ښاریانو ستونزو او شکایتونو ته رسیده ګي وشوه
د تل په څیر نن یو ځل بیا د مهترلام ښاروالۍ د لومړۍ ناحيي مدیر ملا عباس ابراهیمي په مشرۍ چې د ښاروالۍ امرینو یې ملتیا کوله د ګنې ګوڼې د مخنیوي په موخه یې د مهترلام ښار د پلو لارو د خلاصون کمېسیون ترسره کړ
د یاد کمېسیون له لوري په غیرې قانوني توګه چې کومو دوکاندارانو او هټیوالو په ترپالونو، چترۍ ګانو او نور شیانو باندې پلې لارې بندې کړې وې د ښاریانو پرمخ خلاصې کړې
د لومړۍ ناحيي مدیر ملا عباس ابراهیمي وویل: چې د مهترلام ښاروال الحاج مولوي رحمت الله شهامت په لارښونه د ښاري نظم راوستلو او د پلو لارو د خلاصون په موخه یو ګډ کمېسیون جوړ شوی چې یاد کمېسیون نن یوځل بیا په ښار کې د ښاریانو ستونزو او شکایتونو ته رسیده ګي وکړه او هغه پلې لارې چې د دوکاندارانو او هټیوالو له لوري بندې شوې وې په بشپړ ډول د ښاریانو پرمخ پرانیستل شوې
نوموړي وویل چې یاد کمېسیون په دوامداره توګه په مهترلام ښار کې فعالیت کوي، که هر چا لاره بنده کړه قانوني چلند ورسره کېږي چې بیا حق د شکایت نه لري
د مهترلام ښار اوسیدونکي د ښاروالۍ د یاد کمېسیون له فعالیتونو خوشاله دي او وايي چې د پلو لارو په خلاصیدو سره د تګ راتګ سهولتونه برابریږي او د ترافیکي پیښو مخنیوی کېږي
د یادونې وړ ده چې یاد کمېسیون وخت پر وخت په ښار کې خپل فعالیتونه کوي او ښاریانو لپاره اسانتیاوې برابروي
