د مهترلام ښاروالۍ له لوري د پلو لارو د خلاصون کمیسیون ترسره شو

د مهترلام ښاروالۍ د لومړۍ ناحيي مدیر ملا عباس ابراهیمي په مشرۍ چې د ښاروالۍ ټولو امرینو یې ملتیا کوله د ګنې ګوڼې د مخنیوي په موخه یې د مهترلام ښار د پلو لارو د خلاصون کمېسیون ترسره کړ
د یاد کمېسیون له لوري په غیرې قانوني توګه چې کومو دوکاندارانو او هټیوالو په ترپالونو، چترۍ ګانو او نور شیانو باندې پلې لارې بندې کړې وې د ښاریانو پرمخ خلاصې کړې
د لومړۍ ناحيي مدیر ملا عباس ابراهیمي ټولو دوکاندارانو او هټیوالو ته خبرداری ورکړ چې د پلو لارو خلاصون ته په جدي توګه پام وکړي تر څو یادې لارې د ښاریانو او اطفائي پر مخ خلاصې اوسي، که هر چا لاره بنده کړه قانوني چلند ورسره کېږي چې بیا حق د شکایت نه لري
د مهترلام ښار یو تن اوسیدونکي زاهد الله وویل: "دا یو ډېر مهم اقدام دی، ځکه زموږ ډېرې لارې بندې وې او تګ راتګ سخت شوی و، موږ له مهترلام ښاروالۍ څخه مننه کوو چې ښاري نظم ته پام کوي."
د یادونې وړ ده چې دغه کمېسیون به د راتلونکو ورځو په اوږدو کې هم خپل فعالیتونو ته دوام ورکوي تر څو د ښاریانو لپاره د تګ راتګ لا ډیر سهولتونه برابر شي