د مهترلام ښار قصابانو ته د وروستي ځل لپاره خبرداری ورکړل شو

د مهترلام ښاروالۍ د ښاري حکومتولۍ آمریت له لوري د پاک چاپېریال ساتنې او د ښاریانو د روغتیا خوندي کولو په موخه د مهترلام ښار د قصابانو څارنه او تعقیب ترسره شو

د یادې څارنې پر مهال د ښاري حکومتولۍ آمر الحاج عباس عمري چې د ښاروالۍ د مطبوعاتو او عامه پوهاوي مدیر لعل آغا ابراهیمي یې ملتیا کوله، قصابانو ته وویل چې له دې وړاندې تاسو ته سپارښتنه شوې وه څو د غوښې د میده کولو ګنډې دشپې له خوا په خوندي ځای کې کېږدئ او د ورځې پر مهال د غوښې د ساتنې لپاره پرې پلاستیکي پوښونه ولګوئ تر څو د ککړتیا مخه ونیول شي

نوموړي زیاته کړه، هغه قصابانو چې له یادو سپارښتنو سرغړونه کړې وه، د وروستي ځل لپاره ورته خبرداری ورکړل شو او ټینګار وشو چې که بیا سرغړونه تکرار شي، نو قانوني چلند به ورسره کېږي

د یادونې وړ ده چې د ښار د پاکوالي او د ښاریانو د روغتیا ساتنې په موخه وخت پر وخت د مهترلام ښاروالۍ ښاري حکومتولۍ آمریت له لوري یاد اقدامات ترسره کېږي