د پنځم ګذر اوسېدونکو د خپل ګذر وکیل د تمدید غوښتنه وکړه
د مهترلام ښار د لومړۍ ناحیې اړوند د پنځم ګذر یو شمېر اوسېدونکو د خپلو ستونزو د حل او د ګذر وکیل د تمدید غوښتنې په موخه د مهترلام ښاروالۍ د ښاري حکومتولۍ آمر الحاج عباس عمري سره ناسته ترسره کړه
د سیمې اوسېدونکو په پیل کې له ښاروالۍ څخه مننه وکړه، چې د خلکو ستونزې په مستقیم ډول اوري
هغوی غوښتنه وکړه، چې حاجي نبي سرور، چې مخکې د یاد ګذر وکیل و او اوس یې درې کلنه موده بشپړه شوې، بېرته د ګذر وکیل په توګه وټاکل شي، ځکه د خلکو په وینا نوموړی یو ایمانداره او خدمتګاره شخص دی
د ښاري حکومتولۍ آمر الحاج عباس عمري ټولو راغلو مشرانو ته د ښه راغلاست ترڅنګ ډاډ ورکړ، چې د خلکو غوښتنو او ستونزو ته به د ښاري حکومتولۍ د طرزالعمل له مخې رسېدنه کېږي
