د یونفس موسسې مسؤلینو په مهترلام ښار کې د ۱۶ پروژو د عملي کولو په موخه له مهترلام ښاروال سره وکتل
د نړیوال بانک تر چتر لاندې د یونفس موسسې مسؤلینو په مهترلام ښار کې د ۱۶ پراختیايي پروژو د عملي کولو په موخه له مهترلام ښاروال الحاج مولوي نظر محمد عتیق سره لیدنه وکړه
په دې لیدنه کې مهترلام ښاروال د یونفس موسسې راغلو مسؤلینو ته ښه راغلاست وویل او ډاډ یې ورکړ، چې ښاروالۍ به د یادو پروژو د تطبیق په برخه کې بشپړه همکاري وکړي
نوموړي ټینګار وکړ، چې د پروژو د پلي کېدو بهیر به په شفاف او منظم ډول پرمخ ولاړ شي او د ښار ټولو ګذرونو ته به په عادلانه ډول خدمات وړاندې شي
د یونفس موسسې مسؤل هم د ښاروال له همکارۍ مننه وکړه او څرګنده یې کړه، چې په ۱۴۰۵ مالي کال کې به د مهترلام ښار په ټولو ګذرونو کې شپاړلس د بیارغونې پروژې د یونفس موسسې په مالي لګښت عملي شي
د هغه په وینا، د دغو پروژو په پلي کېدو سره به له یوې خوا خلکو ته د کار زمینه برابره شي او له بلې خوا به د ښار د آبادۍ او پرمختګ بهیر لا پیاوړی شي
د یادونې وړ ده، چې د ښاروالۍ له داخلي بودیجې څخه به هم په ۱۴۰۵ مالي کال کې په مهترلام ښار کې یو شمېر پروژې پلي شي
