د یو لړ مهمو پروژو په تړاو د مشورتي بورډ له غړو سره ناسته ترسره شوه
د مهترلام ښاروال الحاج مولوي رحمت الله شهامت په مشرۍ د ۱۴۰۵ مالي کال د یو لړ مهمو پروژو په تړاو د مشورتي بورډ له غړو سره مشورتي ناسته ترسره شوه
یاده ناسته د ښاروالۍ په مقام کې جوړه شوې وه، چې پکې د ښاروال ترڅنګ د تخنیکي او مسلکي چارو آمر انجنیر زاهد الله مجددي، د ښاري حکومتولۍ آمریت مدیرانو او د مشورتي بورډ غړو ګډون کړی و
په پیل کې مهترلام ښاروال ټولو ګډونوالو ته ښه راغلاست وویل، او څرګنده یې کړه، چې د ښاروالۍ له لوري د مهترلام ښار په کچه هر مهم فعالیت او پروژه د مشورتي بورډ له غړو سره تر سلا مشورې وروسته عملي کېږي
نوموړي زیاته کړه، هغه پروژې چې په تېرو کلونو کې د مشورتي بورډ له لوري تایید شوې وې، د ښاروالۍ له خوا په منظم او شفاف ډول بشپړې شوې دي
د ناستې په ترڅ کې د تخنیکي او مسلکي چارو آمریت له لوري د ۱۴۰۵ کال لپاره یو شمېر مهمې پروژې وړاندې شوې، چې پکې د سړکونو جوړول، د پارکونو رغول، د پلو لارو او د لښتیو جوړول شامل دي
د مشورتي بورډ غړو په نوبت سره خپلې خبرې وکړې، د ښاروالۍ روان فعالیتونه یې وستایل او له ښاروال ښاغلي شهامت څخه یې مننه وکړه، چې د ښار اړوند هره مهمه پرېکړه له دوی سره په مشوره مخې ته وړي
د ناستې په پای کې د مشورتي بورډ له لوري یادې پروژې تائید شوې او د تطبیق لپاره یې لومړیتوبونه وټاکل شول، ترڅو په ۱۴۰۵ کال کې په منظم او اغېزمن ډول پلي شي
