مهترلام ښاروالۍ د روان کال په دوو ربعو کې ۵۵ میلیونه افغانۍ عواید راټول کړې
د مهترلام ښاروالۍ د عوایدو او محاسبې آمریت تر چتر لاندې د عوایدو مدیریت تر دې دمه د روان ۱۴۰۴ مالي کال په لومړیو دوو
ربعو کې شاوخوا ۵۵ میلیونه افغانۍ عواید راټول کړي دي
د عوایدو مدیر نېکت الله عزیزي وايي، چې یاد عواید د ښاروالۍ د مارکیټونو او غرفو له کرایو، د ښاري خدمتونو، دروازو، او د جواز ورکولو له درکه په شفاف او دقیق ډول ټول شوي دي
نوموړی زیاتوي، چې د عوایدو راټولولو چارې د ټاکل شوي پلان له مخې په منظم ډول روانې دي او تمه ده، چې د کال تر پایه به د عوایدو کچه له وړاندوینې هم لوړه شي
باید وویل شي، چې مهترلام ښاروالۍ سږکال د شاوخوا ۱۰۳ میلیونه افغانیو په ارزښت ۱۱ د بیارغونې پروژې هم عملي کوي، چې پکې د سرکونو، کانالونو، پلچکونو، پلو لارو جوړولو ترڅنګ د ښار تجارتي مارکیټ جوړول، د پارکونو زرغونول، د پاک چاپېریال ساتنې لپاره د کثافتدانیو جوړول او د کابل ـ جلال آباد هډې په سیمه کې د تیلو پمپ استیشن جوړول شامل دي
د یادونې وړ ده، چې مهترلام ښاروالۍ تېر کال د لغمان مهترلام ښار کې د ۸۶ میلیونه افغانیو په لګښت ۱۶ د بیارغونې پروژې عملي کړې وې
