مهترلام ښاروال مجاهد رحمت زي د روژې مبارکې میاشتې د رارسېدو په مناسبت، په ښار کې د نرخونو کنټرول په موخه د ښاروالۍ مشورتي شورا، ځوانانو بورډ او د اصنافو مشرانو سره ناسته وکړه!
مهترلام ښاروال له اصنافو وغوښتل، چې د نرخونو په کنټرول کې مهترلام ښاروالۍ سره همکاري وکړي او په دوکاندارنو دې سپارښتنه وکړي، ترڅو د جنسونو په بيه کې پر درنو ښاریانو ظلم ونکړي.
دغه راز مهترلام ښاروال مجاهد رحمت زي له مشورتي شورا او د ځوانانو بورډ استازو څخه هم وغوښتل، چې د نرخونو د کنټرول په برخه کې ښاروالۍ سره په ګډه ولسي څارنه وکړي، چې له امله يې په ښار کې نرخونه کنټرول شي او ښاريان مو هوسا شي.
د ناستې پر مهال مهترلام ښاروال د ښاروالۍ اړوندو څانګو ته هم دنده وسپارله، چې نرخ نامې ترتیب کړي او پر هټيوالو يې د خبرتيا په بڼه ووېشي.
ښاروال وويل، چې په دې برخه کې ښاروالۍ ځانګړی پلان لري، چې له امله به يې نرخونه کنټرول شي او سرغړونکو سره به قانوني چلند کېږي.
په پای کې د ناستې ګډونوالو ژمنه وکړه، چې په دې برخه کې به ښاروالۍ سره مرسته کوي، ترڅو په ښار کې نرخونه کنټرول واوسي.
