په مهترلام ښار کې د نوي بېرغونو د لګولو بهیر پيل شو
د مهترلام ښاروالۍ د ښاري حکومتولۍ آمریت د ښار د ښکلا او ملي نښو د درناوي په موخه په مهترلام ښار کې د زړو بېرغونو د راټولولو او د نویو بېرغونو د لګولو چارې پیل کړي دي
د دې پروسې په لړ کې به په ښار کې درې لارې، چوکونه او هغه مهم ځایونه چې د خلکو د تګ-راتګ زیات مرکزونه دي، له نویو بېرغونو به سينګار شي
د ښاري حکومتولۍ آمر الحاج عباس عمري وايي، چې دا بهیر د مهترلام ښاروال الحاج مولوي رحمت الله شهامت د ځانګړې لارښونې له مخې عملي کېږي. هغه زیاتوي، چې د بېرغونو لګول یوازې یو کاري اقدام نه، بلکې د ملي ارزښتونو د درناوي یوه ښکاره نښه ده
همداراز نوموړی زیاتوي، چې دوی هر وخت یاده چاره د بېرغ د احترام او د ښار د ښکلا په موخه ترسره کوي، ترڅو له نوي بېرغونو سره د ښار ښکلا لا زیاته شي
د مهترلام ښار اوسېدونکي هم دغه اقدام ستايي او وايي، چې د نوي بېرغونو لګول ښار ته نوې څېره ورکوي
