په پنځمه ناحیه کې د ۷۰ زره امریکايي ډالرو په ارزښت د اوبو رسولو د یوې مهمې پروژې چارې پیل شوې

د مهترلام ښار د پنځمې ناحیې اړوند اووم ګذر باباصاحب کمپ کې د ملګرو ملتونو د بشري مېشتځایونو مؤسسې (UN-Habitat) په مالي ملاتړ او د مهترلام ښاروالۍ په همکارۍ د اوبو رسولو د یوې مهمې پروژې چارې پیل شوې

د یادې پروژې د بنسټ ډبره د مهترلام ښاروالۍ د ښاري حکومتولۍ آمر الحاج عباس عمري، د پنځمې ناحیې مدیر محمد منیر فاروق او د UN-Habitat مؤسسې مسؤل انجنیر عبدالحق تحریک له لوري کېښودل شوه

د مؤسسې مسؤل انجنیر عبدالحق تحریک وویل، چې یاده پروژه د ۷۰ زره امریکايي ډالرو په ارزښت پلې کېږي، چې پکې د اوبو ذخیره، د اوبو رسولو شبکه او لمریزې برېښنا سیستم شامل دي  چې په بشپړیدو سره به یې شاوخوا ۳۰۰ کورنیو ته د څښاک پاکې اوبه برابرې شي

په همدې حال کې د مهترلام ښاروالۍ د ښاري حکومتولۍ آمر الحاج عباس عمري د UN-Habitat مؤسسې له مسؤلینو مننه وکړه او پر نورو ملي او نړیوالو مؤسسو یې غږ وکړ، چې د مهترلام ښار د بیارغونې او پراختیا په برخه کې همکاري وکړي

د سیمې اوسېدونکو د یادې پروژې د پیل له امله خوښي څرګنده کړه او وې ویل، چې له کلونو راهیسې د څښاک د اوبو له جدي ستونزو سره مخ وو، چې د دې پروژې په بشپړېدو سره به یې ستونزې تر ډېره حل شي