د مهترلام ښار د پراختیا او د الینګار عمومي سرک د دوه لینه کولو په موخه له مشرانو سره د همغږۍ ناسته ترسره شوه
د مهترلام ښار د پراختیا او د الینګار په مسیر د عمومي سرک د دوه لینه کولو په موخه، مهترلام ښاروال الحاج مولوي نظر محمد عتیق، د ښار او کور جوړونې رئیس مولوي حسین احمد تیلوي، د ښاروالۍ تخنیکي او مسلکي آمر انجنیر زاهد الله مجددي، د څارنې او ارزونې آمر الحاج عبدالطیف اخندزاده او د ښاري حکومتولۍ آمر الحاج عباس عمري له لوري د یادې سیمې له مشرانو سره د همغږۍ ناسته ترسره شوه
په یاده ناسته کې مهترلام ښاروال ټولو ګډونوالو ته د ښه راغلاست ترڅنګ ښاروالۍ د ټولو ګډ کور یاد کړ او ویې ویل، چې د مهترلام ښار د پراختیا او ښاریانو ته د لا زیاتو اسانتیاوو د برابرولو لپاره هڅې روانې دي، ترڅو ښار پراخ او خلکو ته د کار زمینه برابره شي
ښاروال زیاته کړه، چې د ښار د سړکونو د پراختیا چارې په تدریجي ډول پيل شوې دي او په همدې لړ کې به د الینګار عمومي سرک له الینګار هډې څخه تر پهلوان بابا پورې دوه لینه شي، چې د تګ راتګ ستونزې به ورسره تر ډېره حل شي
د ښار او کور جوړونې رئیس مولوي حسین احمد تیلوي وویل، هغه منظور شوي پلانونه چې پخوا ترتیب شوي، عملي بڼه به خپله کړي او ټولې رغنیزې چارې به د منظور شوو پلانونو له مخې ترسره کېږي
نوموړي د الینګار په مسیر له ټولو اوسېدونکو وغوښتل، چې د هر ډول نوې آبادۍ پر مهال دې د سرک له منځنۍ کرښې (سنټر) څخه دواړو خواوو ته ۱۵ ـ ۱۵ متره فاصله په پام کې ونیسي، ترڅو په راتلونکي کې له احتمالي زیانونو څخه خوندي پاتې شي
د سیمې مشرانو په نوبت سره خبرې وکړې، د سرک د پراختیا او جوړېدو هرکلی یې وکړ او ټینګار یې وکړ، چې د پروژې د پلي کېدو پر مهال باید د خلکو حقوق په پام کې ونیول شي، ترڅو هم د ښار د پراختیا چارې پر مخ ولاړې شي او هم خلکو ته زیان ونه رسېږي
د یادونې وړ ده، چې د مهترلام ښاروالۍ له لوري د ښار د پراختیا، د ګڼې ګوڼې د مخنیوي او د ښاري اسانتیاوو د رامنځته کولو په موخه یو شمېر پراختیایي پروژې تر کار لاندې دي
