په مهترلام ښار کې د غیرې قانوني دوکانونو د جوړولو مخه ونیول شوه
د مهترلام ښار د ښاري نظم د ټینګښت او د عامه ملکیتونو د خونديتوب په موخه، د ښاروال الحاج مولوي رحمت الله شهامت په لارښونه، د ښار د لومړۍ ناحیې اړوند د علاج روغتون ترڅنګ هغه غیرې قانوني دوکانونه تخریب شول، چې یو شخص د ښاروالۍ له اجازې پرته یې جوړول پیل کړي وو
یاد اقدام د لومړۍ ناحیې د مدیر ملا عباس ابراهیمي له لوري تر سره شو، چې د ځایي څارنې پر مهال یې د ښاروالۍ ملکیت کې د شخصي ګټې لپاره د دوکانونو جوړېدو مخه ونیوله او مخکې تر دې چې کار بشپړ شي، غیرې قانوني جوړ شوي دوکانونه تخریب شول
د ناحیې مدیر ملا عباس ابراهیمي څرګنده کړه چې ښاروالۍ به هیچا ته اجازه ور نه کړي چې د قانون خلاف د ښاروالۍ په ملکیتونو کې په خپلسري ډول ودانیز فعالیتونه تر سره کړي
نوموړي زیاته کړه چې د عامه شتمنیو څخه دفاع د ښاروالۍ مسؤلیت دی، او د ښار نظم او قانون ته درناوی د ټولو ښاریانو دنده ده
د مهترلام ښاروالۍ مشرتابه له ټولو ښاریانو غواړي چې د ښار د پراختیا، نظم او قانوني اصولو رعایت کې له ښاروالۍ سره همکاري وکړي، او له هر ډول غیرې قانوني تصرف څخه ډډه وکړي
