د مهترلام ښاروالۍ له لوري د یو نيم میلیون افغانیو په ارزښت د یوې پروژې چارې پیل شوې
د مهترلام ښاروالۍ له داخلي بودیجې څخه د یو نيم میلیون افغانیو په ارزښت د لغمان د اقوامو او قبایلو ریاست مخې ته د سرک دواړو خواوو د پلو لارو د جوړولو، د کټارو نصبولو او د برېښنايي تنویري پایو د لګولو چارې پیل شوې
د پروژې د پرانېستې په مراسمو کې د لغمان والي قاري بختیار معاذ، د مهترلام ښاروال الحاج مولوي رحمت الله شهامت، د ښاروالۍ امرینو، انجنیرانو او یو شمېر مدیرانو ګډون درلود
لغمان والي په خپلو خبرو کې وویل، چې د ولایت په مرکز او ټولو ولسوالیو کې د بیارغونې چارې په منظم ډول روانې دي، چې پکې د سرکونو، استنادي دیوالونو، ښوونځیو او روغتیایي مرکزونو جوړیدل شامل دي
نوموړي زیاته کړه چې مهترلام ښاروال یو ویښ، متعهد او کارکونکی شخصیت دی، او د هغه په شتون کې به د ښار د پرمختګ لپاره لا ډېرې پروژې پلې شي
مهترلام ښاروال ښاغلي شهامت وویل، چې د یادې پروژې له مخې به د سرک دواړو خواوو ته پلې لارې جوړې، د ۲۲۰ مترو په اوږدوالي کټارې نصب او ۸ برېښنايي تنویري پایې ولګول شي
د نوموړي په وینا، دغه پروژه به په څلورو میاشتو کې بشپړه شي او په ورځني ډول به پکې شاوخوا ۱۵ کسانو ته د کار کولو زمینه هم برابره شي
د نصرت محمدي شرکت مسؤل ډاډ ورکړ، چې د کار چارې به د ښاروالۍ د لارښوونې سره سم، په اساسي او معیاري بڼه او په ټاکلي وخت بشپړې کړي
د مهترلام ښار اوسېدونکي د ښاروالۍ له هڅو خوښ دي او وایي، چې د پلو لارو جوړیدل، د کټارو نصبول او د تنویري پایو لګول به د یادې سیمې ښکلا لا زیاته او د تګ راتګ اسانتیاوې به رامنځته کړي
د یادونې وړ ده چې مهترلام ښاروالۍ سږکال د ۱۰۳ میلیونه افغانیو په ارزښت په مهترلام ښار کې د بیارغونې پروژې پلي کوي
