د مهترلام ښاروالۍ لپاره نوی ښاروال معرفي شو
د ریاست الوزراء د (۶۴۴۰) شمېرې حکم له مخې د مهترلام ښاروالۍ ښاروال الحاج مولوي رحمت الله شهامت د کنړ ولایت د اسعداباد ښاروالۍ د ښاروال په توګه وټاکل شو او د اسعداباد ښاروال الحاج مولوي نظر محمد عتیق د لغمان ولایت د مهترلام ښاروالۍ د نوي ښاروال په توګه مقرر شو
د نوي ښاروال د معرفي کولو مراسم د لغمان ولایت مهترلام ښاروالۍ د مجلسونو په تالار کې ترسره شول، چې پکې د ولایت د دفتر رئیس شکرالله کاوون، د امر بالمعروف رئیس مولوي پاچاه ګل احمدي، د مهترلام ښاروالۍ پخوانی ښاروال الحاج مولوي رحمت الله شهامت، د امنیې قوماندانۍ مرستیال مولوي قیس جنید، د بېلابېلو ادارو رئیسانو، آمرینو او له کنړ ولایت څخه راغلو مشرانو ګډون کړی و
په مراسمو کې د امر بالمعروف رئیس مولوي پاچاه ګل احمدي نوي ښاروال ته ښه راغلاست وویل او په چارو کې یې ورته د بریالیتوب دعا وکړه
د لغمان ولایت د دفتر رئیس شکرالله کاوون د مهترلام ښاروالۍ د پخواني ښاروال خدمتونه وستایل او وې ویل چې په دولتي ادارو کې تغییر او تبدیل د نظام یو اصل دی
نوموړي همداراز نوي ښاروال ته مبارکي ورکړه او د ولایت مقام په استازیتوب یې د بشپړې همکارۍ ډاډ ورکړ
د مهترلام ښاروالۍ پخواني ښاروال الحاج مولوي رحمت الله شهامت هم نوي ښاروال ته ښه راغلاست وویل، په چارو کې یې ورته د بریا هیله وکړه او د ښاروالۍ له ټولو کارکوونکو یې وغوښتل چې په اخلاص او ایماندارۍ سره د نوي ښاروال ملاتړ وکړي او خپلې دندې په ښه ډول ترسره کړي
په همدې حال کې د مهترلام ښاروالۍ نوي ښاروال الحاج مولوي نظر محمد عتیق وویل، چې په پوره اخلاص او صداقت به د مهترلام ښار اوسېدونکو ته خدمت کوي او د ښار د پراختیا او پرمختګ لپاره به نه ستړې کېدونکې هڅې وکړي
د پروګرام په پای کې د مهترلام ښاروالۍ آمرینو، مدیرانو، مامورینو او کارکوونکو نوي ښاروال ته د مبارکۍ مراتب هم وړاندې کړل
