په دویمه ناحیه کې د پلو لارو، کټارو او برېښنايي تنویري پایو چارې بشپړې او ګټې اخیستنې ته وسپارل شوې
د مهترلام ښاروالۍ له لوري د لغمان ولایت د مهترلام ښار د دویمې ناحیې اړوند د اقوامو او قبایلو ریاست مخې ته د پلو لارو د جوړولو، د کټارو او برېښنايي تنویري پایو د لګولو چارې بشپړې او ګټې اخیستنې ته وسپارل شوې
یاده پروژه د مهترلام ښاروال الحاج مولوي رحمتالله شهامت، د چاپېریال ساتنې رئیس حاجي احمد شاه ابراهیم، د ښاروالۍ آمرینو او د یو شمېر ادارو مسؤلینو په حضور کې پرانیستل شوه
مهترلام ښاروال وویل، دغه پروژه د مهترلام ښاروالۍ له داخلي بودیجې د شاوخوا یو نیم میلیون افغانیو په لګښت په دوو میاشتو کې بشپړه شوه، چې د تطبیق پر مهال یې هره ورځ نږدې ۱۵ کسانو ته د کار زمینه هم برابره شوې وه
نوموړي زیاته کړه، چې د دغې پروژې په پلي کېدو سره نه یوازې د سیمې ښکلا زیاته شوې، بلکې د تګ راتګ اسانتیاوې هم برابرې شوې او ښاریانو ته منظم او خوندي چاپېریال رامنځته شوی دی
د سیمې اوسېدونکو هم د یادې پروژې له بشپړېدو خوښي څرګنده کړه او وې ویل، چې له یوه اړخه د سیمې بڼه بدله شوې او له بلې خوا یې ورځنی تګ راتګ اسانه شوی دی
د یادونې وړ ده، چې د مهترلام ښاروالۍ له لوري دا مهال د ښار په بېلابېلو سیمو کې د څلورو نورو پراختیايي پروژو چارې هم روانې دي، چې شاوخوا ۷۰ سلنه کارونه یې بشپړ شوي دي
