د مهترلام ښار د موټرو پلورنځیو مسؤلینو خپلې ستونزې له ښاروال سره شریکې کړې
د مهترلام ښار د موټرو د پلورنځیو (بارګینونو) مسؤلینو د خپلو ستونزو د حل په موخه له مهترلام ښاروال الحاج مولوي نظر محمد عتیق سره ناسته وکړه
د بارګینونو مسؤلینو په پیل کې د ښاروالۍ له ریاست مقام څخه مننه وکړه، چې د خلکو ستونزې په مستقیم ډول اوري، او وروسته یې خپلې یو شمېر ستونزې او غوښتنې له ښاروال سره شریکې کړې
مهترلام ښاروال ټولو راغلو مسؤلینو ته د ښه راغلاست ترڅنګ ښاروالۍ د ټولو ګډ کور یاد کړ او ډاډ یې ورکړ، چې شته ستونزو ته به یې د امکاناتو او اصولو له مخې رسېدنه کېږي
ښاروال همداراز مسؤلینو ته سپارښتنه وکړه، هغه ځمکې چې د ښاروالۍ له لوري د بارګینونو لپاره ورکړل شوي او کارونه یې نیمګړي پاتې دي، باید ژر تر ژره یې چارې بشپړې شي
نوموړي خبرداری ورکړ، که په ټاکلې موده کې لازم اقدامات ترسره نه شي، یادې ځمکې به بېرته ترې واخیستل شي
د یادونې وړ ده، چې د مهترلام ښاروالۍ له لوري د ښار د پراختیا او نظم په موخه د موټرو بارګینونه د پنځمې ناحیې اړوند ترمینل ساحې ته انتقال شوي او اوس مهال هلته فعالیت کوي
