د دویمې ناحیې مدیر له ګذر وکیلانو سره د همغږۍ ناسته وکړه
د مهترلام ښاروالۍ د دویمې ناحیې نوي ټاکل شوي مدیر مولوي عبدالرحمن مزمل د یادې ناحیې له ګذر وکیلانو سره د معرفت او همغږۍ ناسته ترسره کړه
په پیل کې ګذر وکیلانو ځانونه معرفي کړل، نوي ټاکل شوي مدیر ته یې د دندې مبارکي وړاندې کړه او په یاده ناحیه کې یې د غوره خدمت غوښتنه وکړه
وروسته، د ناحیې مدیر په خپلو خبرو کې د همغږۍ پر پیاوړتیا ټینګار وکړ او وې ویل، چې ګذر وکیلان د ولس او ادارې ترمنځ مهم پُل دی او باید د خلکو ستونزې پر وخت له ادارې سره شریکې کړي
نوموړي همداراز له ټولو ګذر وکیلانو وغوښتل، چې د سیمې د نظم، ښه مدیریت او د خلکو د خدمت په برخه کې له ادارې سره نږدې همکاري وکړي
د یادونې وړ ده چې مولوي عبدالرحمن مزمل د چارو ادارې لوی ریاست د ۲۲۸۹ شمېرې له مخې د مهترلام ښاروالۍ د دویمې ناحیې مدیر ټاکل شوی دی
