لغمان کې د مهترلام ښاروالۍ له لوري د ۱۲ میلیونه افغانیو په لګښت کانکریټي سړک جوړ او د ترافیکو پرمخ پرانېستل شو
لغمان کې د مهترلام ښاروالۍ له داخلي بودیجې څخه د مرکز مهترلام اړوند دویمې ناحیې "حاجيانو کلي" کې د ۱۲ میلیونه افغانیو په لګښت کانکریټي سړک په اساسي شکل جوړ او نن رسماً د ترافیکو پر مخ پرانېستل شو
د یاد سرک د پرانستې پر مهال د مهترلام ښاروال الحاج مولوي رحمت الله شهامت ترڅنګ، د سرې میاشتې رئیس مولوي ولي الله وقار، د ښاروالۍ آمرینو، یو شمیر مدیرانو، د یادې سیمې ګذر وکیل او ولسي خلکو ګډون کړی وو
مهترلام ښاروال الحاج مولوي رحمت الله شهامت وویل "یاد سړک ۳۶۰ متره اوږدوالی او ۱۵ متره پراخوالی لري چې د ښاروالۍ له داخلي بودیجې څخه د یوولس میاشتو په موده کې په کانګریټي ډول جوړ او ۶۰۰ کورنیو ته یې د تګ راتګ زمینه برابره کړه"
هغه همداراز زیاته کړه چې په یاده پروژه کې په ورځني ډول شاوخوا ۴۰ کسانو ته د کار کولو زمینه هم برابره شوې وه
د رڼا څرک شرکت نماینده بشېر سائل وویل، یاد سرک یې په اساسي او معیاري شکل جوړ کړی او خلک کولای شي چې په اسانۍ سره پرې تګ راتګ وکړي
د سیمې اوسېدونکو رسنیو سره په خبرو کې وویل چې پخوا یې پر یاده لار تګ راتګ ستونزمن و، خو اوس یې په جوړیدو سره ددوی ستونزې حل شوې، هغوی د ښاروالۍ وروستي فعالیتونه وستایل او مننه یې وکړه چې د ښاریانو لپاره یې په بیلابیلو برخو کې سهولتونه رامنځته کړي دي
د یادونې وړ ده چې دا د حاجیانو د سرک لومړۍ پاس چارې وي د دویم پاس چارې به یې هم سږکال ترسره شي
