په مهترلام ښار کې د پاک چاپېریال ساتنې په موخه ګډ آشر ترسره شو
د مهترلام ښاروالۍ د ښاري حکومتولۍ آمریت تر چطر لاندې د پاک چاپېریال ساتنې او د ښاري فرهنګ د پیاوړتیا په موخه په مهترلام ښار کې ګډ آشر ترسره شو
یاد آشر چې د مهترلام ښاروال الحاج مولوي رحمت الله شهامت په مشرۍ برابر شوی وو، د ښاري حکومتولۍ امر الحاج عباس عمري ترڅنګ د ښاروالۍ امرینو، مدیرانو، ګذر وکیلانو، ورزشکارانو، د اصنافو ریاست مسؤلینو او ښاریانو ګډون کړی وو
د ښاري حکومتولۍ امر الحاج عباس عمري وویل، چې نن یې د مهترلام ښاروال په مشرۍ په ښار کې د پاک چاپېریال ساتنې او ښاري فرهنګ د پیاوړتیا په موخه ګډ آشر ترسره کړ
همداراز نوموړي له ټولو ښاریانو غوښتنه وکړه چې د ښار پاک ساتلو کې له ښاروالۍ سره همکاري وکړي او کثافات د ښاروالۍ له لوري په لګول شویو کثافت دانیو کې واچوي
د مهترلام ښار اوسېدونکو د ښاروالۍ دا ګډ آشر یو مثبت ګام وباله او ویې ویل، چې دا ډول اقدامات نه یوازې د ښار په پاکوالي کې مرسته کوي، بلکې د خلکو ترمنځ د عامه پوهاوي د لوړولو سبب هم ګرځي
دا لومړی ځل نه دی چې په ښار کې د ښاروالۍ له لوري داسې فعالیت تر سره کېږي بلکې له دې وړاندې هم یاده چاره ترسره شوې ده
