مهترلام ښاروال ته د ښو فعالیتونو له امله ستاینلیکونه ورکړل شول
تیره ورځ د مهترلام ښاروالۍ له لوري ولسونو ته د ۱۴۰۳ مالي کال د حساب ورکونې معلوماتي غونډه ترسره شوه، چې د غونډې ګډونوالو له لوري د مهترلام ښاروال الحاج مولوي رحمت الله شهامت کړې فعالیتونه وستایل شول او د اصنافو ریاست مسؤلینو د مشورتي بورډ غړو او ګذر وکیلانو له لوري هغه ته د ښو کارونو له امله ستایلنلیکونه ورکړل شول
د اصنافو ریاست مسؤلینو وویل: چې مهترلام ښاروال تل هڅه کړې چې د ښاري نظم لپاره مثبته فضاء رامنځته کړي او د خلکو ستونزو ته ژر رسیدنه وکړي، همداراز د مشورتي بورډ غړو او د ګذر وکیلانو په خپلو خبرو کې د ښاروال ولسي چلند، د شفافیت پالنه په مهترلام ښار کې د پروژو پلې کول او له خلکو سره نېغه اړیکه وستایله
مهترلام ښاروال له ټولو ګډونوالو مننه وکړه او ژمنه یې وکړه چې د مهترلام ښار د آبادۍ او سمسورتیا لپاره به لا زیات هلې ځلې او فعالیتونه کوي
د یادونې وړ ده چې په تیر ۱۴۰۳ مالي کال کې د مهترلام ښاروالۍ له داخلي بودیجې د ۸۶ میلیونه افغانیو په لګښت په مهترلام ښار کې ۱۴ پراختیايي پروژې تطبیق شوي، چې په یادو پروژو کې د ښار دننه د سرکونو جوړول او ترمیم، د پیاده روونو جوړول د مهترلام ښار په پنځو ناحیو کې د کثافت دانیو ایښودل، د سبزي مارکیټ د بام ترمیم او په ښار کې د تنویرې پایو نصبول شامل دي
